【明報專訊】教育局早排喺網頁文章〈語文學習支援〉將廣東話定義為「不是法定語言的中國方言」，令唔少人不滿，最後要道歉；有人就發現，原來前教育統籌局有份製作嘅教育電視(ETV)，早喺2004年就將廣東話變身「魔俠」，又安排咗個普通話女俠嚟收伏佢，網民近日搵番條片出嚟，又掀起一場小風波。 教育電視喺2004年拍咗一套叫《驚心動魄(粵普比較之二)》嘅短片，當中有個魔俠出現，話要用粵語一統天下，結果被一個講普通話嘅女俠擊退。網民將呢條片瘋傳，批評教育當局將廣東話妖魔化、想向學生洗腦等等。 教局：戲劇效果無褒貶 Emily梗係即刻問教育局搞邊科啦，教育局中人就解釋，條片係前教統局同港台一齊拍嘅，當時只係想運用戲劇效果，引發學生嘅學習興趣，絕對無意抬高或貶低任何一種語言，仲話政府一直重視推廣兩文三語。 陶傑：粵語係普通話祖宗 不過，呢場捍衛廣東話嘅浪潮已經捲起，專欄作家陶傑喺佢嘅facebook話，粵語係普通話嘅「老祖宗」，粵語「無一字無兩千年的出處」，例如「一篤尿」正統寫法係「一涿尿」，出自東漢《說文解字》：「涿，流下滴也」。陶傑仲話，唔應該以淺薄嘅普通話挑戰源遠流長嘅廣東話，又叫大家問吓國學大師饒宗頤，細個係咪用普通話嚟讀詩詞歌賦。 網民又搵番2002/03年度嘅一份立法會文件，上面寫明司法機構認為中文係法定語文，而中文嘅口講形式，通常係指廣東話。網民呢份堅決保衛廣東話嘅決心，真係唔講得笑！
|
| |
| |
;){kind=small}
;){kind=small}
