【明報專訊】因為講粗口被狙擊嘅培靈學校老師林慧思，舊年9月起請病假；日前專欄作家屈穎妍寫咗篇文章〈筍工〉，提及「放了幾個月病假白支薪水的林老師」云云，林慧思睇完，噚日寫咗篇〈咬着不放〉反擊，指摘屈穎妍抹黑佢，又話為免市民誤以為老師係筍工，所以要澄清自己係因為患抑鬱先要請病假。林慧思仲同Emily講，舊年9至10月最受困擾時，成日發噩夢見到自己返工發生意外或受阻撓，精神科專科醫生都提醒佢一復課可能會再受外界攻擊，要頂得住先好返工。

屈穎妍：唔想撩交嗌

Emily噚日搵過屈穎妍，問佢點睇林慧思嘅反擊，佢就話唔想再回應、唔想撩交嗌。

林慧思話，佢試過食唔落、瞓唔着，每日食4款抗抑鬱藥，𠵱家已減到食1粒半，但若受攻擊，又會瞓得唔好，所以盡量唔睇批評佢嘅專欄，只係今次屈穎妍篇文引起好多討論，佢最終都喺年初一睇咗，結果家人都陪佢難過。佢同Emily講，最陰功係佢患高血壓嘅媽媽，因為擔心佢，要睇醫生食鎮靜劑。

林慧思話仲未知幾時先可以返學，咁病假期間佢做啲乜呢？佢話每星期會跑兩三次步減壓，又會趁林國璋同李武凡牧師喺深水埗橋底為露宿者搞音樂會時，去探訪露宿者，有時間仲會睇吓學校畀佢啲電腦科教科書，備定課準備重返校園。