【明報專訊】身兼幾個撐警聯盟召集人嘅李偲嫣(偲嫣BB)，噚日情人節發起遊行，支持警方喺旺角衝突中執法，Emily見到由尖沙嘴到旺角，遊行人士沿途都高舉印有「愛香港」同「撐警察」嘅粉紅色心形牌，實在好有愛。不過，偲嫣嘅情人節就似乎唔太完美，事關遊行期間有幾個自稱撐警嘅市民聲稱話畀佢「呃錢」，有人仲同佢嘅「粉絲」展開罵戰，搞到要警方幫手調停。

彭春娥：報警無人理

參加撐警遊行嘅愛港之聲前成員彭春娥，聲稱畀偲嫣佢哋「呃咗20萬」，報咗5次警都無人理，仲一度同偲嫣嘅支持者爭執。彭又批評偲嫣成日以愛國名義叫人捐錢，話偲嫣成日當自己係女神，但，「佢唔係女神呀，係女神．棍」。不過指控者喺遊行期間唱衰偲嫣，但現場就未拎出具體證據。偲嫣聽到就即刻反駁，話對方只係喺度搞破壞，唔係參與遊行。

偲嫣事後喺facebook反駁，話從來無同彭春娥交往，「沒有和此人有任何金錢交易，其編作故事內容訛騙大眾，誹謗本人，存心破壞本人名譽，我將全力追究其法律責任！」偲嫣仲話從沒以「愛國」之名叫人捐錢，「亦沒有什麼周圍的呃人錢……，我亦一定全力追究此立心不良的女人」。