【明報專訊】前特首曾蔭權(Donald)上月中刑滿出獄，近日亦有出席公開活動，好似本周二佢就去咗特首林鄭月娥喺禮賓府搞嘅新春酒會，林鄭事後更喺facebook分享佢同Donald夫婦嘅合照。網上噚日有消息話，一直係虔誠天主教徒嘅Donald，3月10號將會出席天主教教區活動，擔任講者分享「從信仰角度分享牢中的感受和反省」。
網上噚日傳出呢個活動嘅海報，話天主教「主教座堂培育組」邀請Donald以前特首身分，喺下月10號下午，喺香港堅道教區中心做主題演講，相信應該係Donald出獄後首個分享會。
從海報可見，有興趣者可以喺座堂經書架索取報名表格，或者喺網頁下載報名表，填妥後喺主日交畀親善大使或者電郵提交，暫時未知活動對象只係教徒，定係公眾都可以報名。
