【明報專訊】留港消費嘅大家唔知有無覺得今個農曆新年周圍都人山人海呢？海洋公園同埋昂坪360喺農曆新年期間都錄得入場客雙位數字升幅。其中海洋公園大年初三當日更一度「迫爆」，要實施人潮管制措施。 海洋公園行政總裁李繩宗噚日同香港大學簽署諒解備忘錄，佢話新春期間公園入場人次比上年同期增加超過一成，相信高鐵香港段同港珠澳大橋開通都係誘因，對公園前景有信心。李又透露，海洋公園萬豪酒店下星期二(19日)正式開幕，屆時所有房都會完全開放預訂。 海洋公園噚日同香港大學簽備忘錄，未來會加強雙方喺教育及研究方面嘅合作，內容重點包括「海洋公園×香港大學HACKATHON(黑客松)」，畀港大學生以一星期時間設計創新方案，提升遊人嘅體驗。優秀學生隊伍設計嘅方案，仲有機會於公園落實推行。
|
| |
| |
