【明報專訊】政府建議將法定男士侍產假增至5日，身兼行會成員嘅自由黨主席張宇人早前接受傳媒訪問，形容「侍產假一日都唔應該有」，言論引起批評。張宇人噚日出席港台節目時堅持立場，批評政府制訂侍產假法例嘅做法死板，擔心勞工界之後會無止境苛索，就好似「買豬骨要埋肉」。 職工盟主席吳敏兒喺同一節目反駁，僱主先係無止境剝削勞工。佢話本港生育率低，唔係好多人需要放侍產假，家庭育兒責任應該由父母分擔，產假和侍產假應該並行；認為解決勞工不足，應由鼓勵生育開始。 節目主持談及政府建議將產假由𠵱家嘅「前四後六」增加到14星期，張宇人就話懷孕員工嘅影響唔止產假，放假前呢個員工亦可能要調離某個崗位，甚至部分人產假後或者會直接辭職；又話即使產假期間政府資助企業，外國所見補貼金額通常都有上限，認為增加產假對業界而言必然有困難。 主持追問，如果按照佢過去對男士侍產假嘅思路邏輯，係咪產假都唔應該增加？張宇人澄清自己作為飲食界議員，有責任反映業界聲音，「好多時我講嘅嘢，唔係張宇人心裏面想嘅嘢」。佢舉例，自己管理一間食肆而有能力負擔，佢唔使等到政府立法，都會提供5日侍產假。 「好多時所言非所想」 稱反映業界聲音 網民對佢嘅言論當然不滿，有人形容張宇人「係生於古代、無良心嘅商家佬」；對於佢話自己說話未必係心中所想，有網民笑言「超誠實！唔怪得咁輕鬆講愛國愛港，原來口不對心！」
|
| |
| |
;){kind=small}
