【明報專訊】公民黨黨魁楊岳橋(AY)近日同專業議政莫乃光到美國考察科技企業，又出席兩場講座，佢哋喺美國時間8號晚喺加州史丹福大學演講，探討香港政經近?。不過，有當地香港人喺講座上「贈興」，向AY送橫額同「感謝狀」，批評佢喺旺角暴動案同民族黨被取締一事上無提供任何支援，諷刺佢「投共」，AY見狀笑笑口接收「贈品」。

一個名為「舊金山香港社團聯會」嘅組織，噚日喺facebook專頁貼出行動相片。佢哋話，本民前前發言人梁天琦因為暴動案被判入獄，但作為泛民代表人物之一嘅AY，對梁天琦無任何支持，令人失望；又批評公民黨作為擁有大量法律資源嘅政黨，「竟然沒有在法律面前伸張正義」。佢哋又批評，AY喺民族黨事件上無捍衛言論自由。

聯會向AY送4份「大禮」，包括寫上「公民民主黨，攜手賣香港」嘅橫額；一條紅線諷刺公民黨不受民族黨事件影響；代表「泛民勾結中共」嘅黃絲帶；以及「投共成功」獎狀。Emily翻查呢個聯會嘅fb專頁，相信係近日先成立，因貼文內容只得今次抗議行動。