【明報專訊】今年係國家推行改革開放40周年，政府發言人噚日宣布，政府以「飛躍四十載 同發展?共繁榮」做慶祝主題，為鼓勵社會各界、地區組織搞慶祝活動，政府推出咗個「認可計劃」，獲認可嘅團體可以喺慶祝活動同宣傳品上，用特區政府設計嘅標誌和口號。 議員稱「冇資助」不會搞 政府內部成立督導委員會統籌同監督重點慶祝活動，由政務司長張建宗領導，但至今仍然未公布究竟有咩活動。有區議員7月收到張建宗嘅信函，鼓勵佢哋搞活動申請成政府認可嘅活動，民主黨南區區議員柴文瀚早前已將信件放上網，阿柴話，上年回歸20周年，各區都有好多政府認可嘅慶回歸活動，但其實好多都唔關回歸事。佢批評認可計劃只係蓋個印喺活動上，並無實質意義，笑言可能會出現一啲活動係「改革開放四十年與後巷清潔」。佢話，自己就唔會搞活動申請呢個認可計劃，一來冇時間，二來呢個計劃冇資助。 金融服務界議員張華峰上年喺立法會特別財會上提及，有啲慶回歸活動，同回歸無關，好似沙田區清潔三無大廈活動、全港國際氣候跨課程比賽等，當時民政事務局長劉江華回應指，慶祝回歸要畀市民參與，「接地氣」嘅活動都會支持。
|
| |
| |
