【明報專訊】民主黨總部近日被「喵星人」入侵，仲搞到該黨創意媒體部嘅員工全部變晒「奴才」。話說民主黨最近收養咗一隻流浪貓叫「豆丁」，仲住咗喺該黨總部，成為創意媒體部嘅「公關貓」。創媒部部長黎敬瑋同Emily講，「豆丁」為辦公室帶來好多正能量，佢又乖又唔會搗亂，笑言可能遲吓帶「豆丁」去中委會面試，睇吓可唔可以做黨員喎。

黎敬瑋話「豆丁」唔止唔怕人，仲好黐身，𠵱家辦公室嘅同事日日都爭寵，希望「豆丁」可以坐自己大髀。佢又話第一日帶「豆丁」去總部時，「豆丁」已經識喺貓沙上如廁，非常聰明。黎敬瑋笑言遲啲可能為「豆丁」拍一輯寫真，幫民主黨籌款。

貓貓之所以叫「豆丁」，係因為生得細粒，已經1歲嘅佢體重只相當於4個月大小貓咁重，所以每日都有「奴才」準時餵食。黎敬瑋話佢哋會煮雞肉、多春魚同鴨胸畀「豆丁」食，仲會餵南瓜幫「豆丁」清腸胃。

創媒部嘅同事現時夾錢一齊養「豆丁」，黎敬瑋話遲啲會成立一個助養基金，黨內嘅議員同總幹事都已經「認頭」，肯一齊助養。