【明報專訊】今日係Cavalia馬術匯演開幕首演，Emily噚日同一眾行家一齊去中環新海濱睇咗45分鐘簡短版預演。舞台背景由60米長嘅巨型熒幕組成，演出期間場景不斷轉換，由森林、草原到大漠一一收喺觀眾眼底，睇一個表演好似去咗幾次旅行咁。

Cavalia嘅特色係現場音樂會配合馬自由自在喺舞台奔放，Emily發現馬每停一下，現場音樂真係會跟隨暫停，相信伴奏者要好集中留意馬兒至得。空中飛人仲會隨馬一齊表演，當然唔少得表演者喺奔跑嘅馬背上站立，少啲平衡力都唔得，但最厲害嘅表演——一個人腳踏兩隻馬嘅馬背一同飛馳嘅Roman Riding，就要觀眾買飛入場先睇到。

今公演 50匹馬水池奔跑

藝術總監Normand Latourelle提過會於最尾一幕喺沙池上注水，今次Emily親眼睇到50匹馬喺水池奔跑，好震撼，最前排觀眾距離馬不足兩米，隨時「濕身」，大會準備毛巾畀坐最前排嘅觀眾遮擋同抹身。不過噚日帳篷內好焗，觀眾都出晒汗，Normand亦焗到面紅紅，佢同大家講冷氣仲差一啲零件未裝上，會確保今日首演冇問題，相關牌照亦會喺今日當局作最後巡視時正式批出。佢仲叫大家唔使擔心會熱親啲馬，因為佢哋最熱試過喺42℃嘅秘魯表演。大會噚日再宣布加開14場，Normand話香港人對馬熟悉，反應熱烈，有望遲吓再加場喎。