【明報專訊】近日唔少傳媒機構嘅不同動作，好似商台炒節目主持李慧玲等，都令社會關注係咪同新聞自由有關，記者協會嚟緊星期日(23日)就會舉辦「反滅聲、撐言論自由」遊行，記協為呼籲更多人參與，噚日就喺YouTube上載咗一條短片，話2014傳媒反滅聲概念大碟 《記協ViVA》火熱登場。

曾志豪柳俊江客串

呢條短片搵嚟傳媒人曾志豪同柳俊江分別扮演「吹神」同「call神」，節目一開始吹神就大唱「自由無限好，卻是近黃昏」，call神就大唱「我係叫人抽廣告，揼你」，擺明諷刺現時傳媒遇到嘅問題。

女主持就話「為愛情，不如為李慧玲」，然後又有把男聲代唱改編歌：「你你你代李慧玲，朝早都變靜，你你你換李慧玲，街坊都吃驚……」其實記協花咁大心機改歌詞、拍片，都係想大家明白新聞界面對嘅問題，呼籲大家參與遊行，遊行會喺星期日下午兩點半，由中環遮打花園出發行去政府總部集會。