【明報專訊】下星期就係農曆新年，多名新任區議員把握機會，寫揮春、派年糕同街坊互動。一向外形亮眼嘅東區區議員仇栩欣，就換咗facebook個人頭像，著住旗袍、拎住揮春，相當有過年氣氛呀。呢張相獲唔少好評，直至噚日截稿，已有逾1500人讚好，好多人留言讚仇栩欣靚女，有區議員私底下就感嘆：「𠵱家做區議員真係愈來愈難。」

揮春有「光復香港，時代革命」

唔少區議員寫揮春送畀街坊。深水埗區議員冼錦豪(豪仔)寫嘅揮春，賀年語句有「光復香港，時代革命」廣東話拼音，又派財神海報、居民捐出嘅衣架等等畀街坊，照片所見，街坊排晒長龍，反應唔錯。

大埔區議員黃兆健仲為街坊畫倉鼠、卡通老鼠，襯番嚟緊嘅鼠年。南區區議員彭卓棋就派年糕畀街坊，相當大手筆。