【明報專訊】近期旅客大減市道淡靜，兩大主題樂園都唔能夠坐以待斃，噚日分別推出港人專享優惠吸客。海洋公園話為咗慶祝開業43周年，今日起至3月31日，11歲或以下小朋友都可以免費入場，65歲或以上嘅老友記除咗現有嘅免費入場優惠，只要喺園內小食亭、指定餐廳同買指定零售產品時出示長者卡，就會有七折優惠，三代同堂入園就啱晒嘞。

海園11歲或以下免費

月底就係農曆新年，送豬迎鼠，嚟到米奇老鼠「主場」，香港迪士尼樂園亦推出香港人專享自助餐套票，由噚日至12月31日，香港人可以1288元優惠價，喺樂園酒店食到3餐自助午餐或晚餐；即日起喺網上買一日門票，仲可以額外獲贈一個迪士尼特選造型頭箍。