【明報專訊】佔領中環發起人之一戴耀廷、新民黨副主席田北辰噚日返母校拔萃男書院(DBS)出席講座，講座由同為DB仔嘅監警會主席翟紹唐主持，呢個組合講佔中就啱晒，不過佢哋噚日講明不談佔中，只談「宗教與政治」。 一半同學有諗佔中問題 本身為基督徒嘅田二少滔滔不絕咁話，佢讀中學時已經對信仰有好大感受，𠵱家每星期都逼自己去查經班，佢話覺得好痛苦，因為發現一個民選議員好難實踐《聖經》講嘅嘢，因為《聖經》話唔好喺大街大巷高聲祈禱，搞到佢每次做「自我宣傳」時都好大掙扎。唔講唔知，二少每次嗌咪時，內心都充滿矛盾，佢仲自爆成日「轉軚」，話從政者要廣聽民意，所以佢有三成時間都會轉軚，就連戴耀廷聽到都話好欣賞二少思想開明、肯聽意見。 雖然戴耀廷講明不談佔中，不過到台下學生發問環節，一班同學仔就照問可也。翟紹唐見同學對佔中咁有興趣，於是就現場做調查，發現近半同學舉手話自己思考過佔中問題。咁聽完師兄交流，學弟心態有無改變？點知就無人舉手，戴耀廷會後就話，證明一班師弟有獨立思考，唔係聽人講兩句就會輕易轉軚。唔知田二少又點睇呢？
|
| |
| |
;){kind=small}
