【明報專訊】今年12月26日嘅「拆禮物日」(Boxing Day)將會出現日環食，不過喺香港只可以見到日偏食，天文台預計當日中午12時17分開始出現「初虧」，太陽會喺正南方；至下午1時55分出現「食甚」，即係太陽被月球遮蓋最多嘅時候，今次日偏食的食分係0.46，即太陽最多有百分之四十六直徑會畀月球遮擋，太陽會喺西南偏南嘅方向；到下午3時22分出現「復圓」，即係日偏食現象已完結。

天文台話如果天氣夠好，大家望向南至西南方，又無嘢阻擋視線，就會係睇日食嘅最佳位置。天文台特別提醒大家，千祈唔好用肉眼或用望遠鏡直視太陽，否則會嚴重損害眼睛，比較安全嘅方法，係透過針孔或望遠鏡，將太陽嘅影像投射喺白紙或硬紙板上，再觀看太陽嘅投影。如果今次睇唔到，下次要到明年6月21日喇。