【明報專訊】立法會議員何君堯噚日召開記者會，傳媒焦點集中於前晚元朗有大批白衣人打市民一事，何君堯多次舌戰在場記者，例如叫《英文虎報》(The Standard)記者「要畀番啲standard」 ，仲話「你可能淨係想講『屎坑』裏面『屎塔』嘅嘢」，又叫記者「sit down」；其間有外媒問到點解同白衣人握手時，何君堯突然伸手，想同記者握手但被拒。 叫記者sit down乖啲 記者會期間，唔少記者都想發問，何君堯一個人講咗接近15分鐘後，記者打斷發言並提問，何君堯就反問「一係你接受訪問好冇？」、「乖啲啦好冇？理性啲啦」；又同記者講「我請你坐低」、「sit down」，之後再發言一輪先接受提問。 有外媒記者問佢，點解片段可見何君堯同白衣人握手，何君堯隨即俯身有意同該記者握手，記者拒絕；何強調同人握手係基本尊重，握手唔代表支持對方做嘅事。有記者喺何君堯離開時，問佢會唔會後悔有同白衣人握手，何君堯就話「我唔會後悔，你問呢個問題，你都唔會後悔」，並轉身離去。
|
| |
| |
