【明報專訊】民建聯陳恒鑌(Ben)上月發現民主黨葵青區議員林紹輝一款「長者福利一覽」嘅海報抄襲民建聯，林紹輝承認「冇查清來源」之餘，指控有民建聯成員跟蹤佢，仲報埋警。民記早前發公開信，要求民主黨紀律委員會嚴正處理林紹輝「抹黑民建聯職員、死口不認錯行徑」，Ben噚日收到民主黨紀委主席劉慧卿回信，話林紹輝未查證資訊圖片來源就用嚟宣傳，行為唔恰當，林已深受教訓同表示歉意。

卿姐封信提到，民主黨紀委認為呢種錯誤不應喺黨內發生，盼黨友引以為鑑，勿重蹈覆轍。Ben向Emily提供咗一張林紹輝嘅橫額相，上面話被「種票黨成員跟蹤事件」，警方會全力徹查；Ben批評，雖然民主黨道歉，但林紹輝態度照舊、繼續攻擊抹黑，佢感受唔到誠意，認為民主黨道歉信只係公關手法，又話林紹輝「水平有限，我唔會對佢有任何期望」。