【明報專訊】近年外國興起豪華露營，漁護署上周六起諮詢公眾嘅郊野公園優化方案，其中一項就係升級露營，兩者概念近似，都係為咗畀啲無乜露營經驗嘅市民感受露營嘅樂趣。漁護署助理署長黎存志同Emily講，升級營地會提供帳幕及煮食設施，市民「兩手揈揈」都可以入住，而為咗避免炒賣同霸營，署方會為受歡迎場地引入預約系統，至於加入港人優先預約機制，就要諮詢民意。

大網仔大棠昂坪有潛力

黎存志話，全港郊野公園有41個指定營地，初步構思會闢設多個新地點提供升級露營服務，當中有潛力嘅地點包括大網仔、大棠同昂坪，實際選址到下階段詳細研究同設計會有結果，唔排除會再增加新選址；現有嘅營地唔受影響，但會擴充部分營地，用嚟提供升級露營服務。

傾向要收費 未有方案

收費方面，佢話𠵱家未有確實方案，但傾向升級露營地點需要收費。佢又話唔同露營地點可以引入各種營運模式，包括政府興建及營運、由私營或非政府機構興建及營運等，當中私人營運嘅營地會加入商業元素，市民唔一定要出國都可以享用到優質服務，但收費水平自然較高。

黎存志話，提升郊野公園設施，最重要目的係吸引市民多啲接近大自然，咁就自然會愛護郊野，增加歸屬感。不過佢話𠵱家提出嘅方案仲係好初步，未有具體時間表及所需撥款。公眾諮詢期至今年5月15日，其間漁護署會舉辦公眾論壇同巡迴展覽，畀市民了解各方案。除咗升級露營，其他方案包括設立可供觀賞遺蹟嘅開放式博物館、樹頂歷奇、遊客服務中心，以及喺營地附近設置小賣店等。