【明報專訊】政府、唔同界別嘅建制派過去一段時間力銷粵港澳大灣區發展對香港有好大機遇，又鼓勵年輕人到大灣區發展，不過似乎年輕人對大灣區仍然認識不深。「香港廣東青年總會」今年8至10月訪問809名身在香港嘅本地青少年，發現雖然過半受訪者聽過大灣區，但有57%受訪者覺得大灣區理念只係「一般」，人數係認同理念嘅一倍；至於大灣區會否為香港帶來機遇，就分別有四成人表示同意及「一般」。總會建議中港政府喺大灣區推出更多便利港人措施，吸引年輕人北上。

設計師嘆創業難

郭基煇隔籬批大企業壟斷

有90後設計師噚日獲安排喺記者會分享內地創業經驗，提到香港創業難其中一個原因，係畀大企業壟斷，坐喺隔籬、本身係新地執董嘅總會副主席郭基煇，聞言就尷尬咁笑咗幾吓，佢之後整體回應港青分享時，就話有啲感觸。

調查以問卷訪問15至39歲青少年，身在香港嘅本地青少年，無論喺求學、就業、創業同居住方面，唔願意前往廣東省發展嘅受訪者，都比願意嘅多一倍。總會認為原因係香港青少年未有內地發展經驗，對內地環境不熟悉，加上落地配套不足，令佢哋卻步。調查同時訪問咗561名身處廣東嘅香港青少年，佢哋對內地發展嘅評價就較為正面。