【明報專訊】工聯會今年成立70周年，唔少得搞吓慶祝活動，噚日工聯會就喺九龍公園舉辦會慶啟動禮，介紹嚟緊一年有乜活動，又邀請到政務司長張建宗做主禮嘉賓。噚日大風又凍凍哋，間中有雨，工聯會會長林淑儀致辭時就話，工聯會70年嚟經歷過風風雨雨，呢啲天氣只係小事，形容佢哋一直都喺困難同挑戰中成長，無論將來是晴是雨，都會牢記工會維護勞工權益嘅使命咁話。

工聯會70周年以「同心．創新」做口號，又介紹一系列活動，其中4月份有多個活動，包括會慶晚會、工聯優惠中心會員日、天星小輪免費乘搭日、會慶文藝晚會、「維港壽星匯」等，又預告下半年會舉辦5區義診日，甚至「大灣區技能比賽」。

工聯會議員、領導層等噚日都有現身，好似工聯會榮譽會長陳婉嫻、理事長吳秋北等，地區有好多街坊出席，一眾政治人物被支持者捉住合照；而有意出戰新界東補選嘅工聯會鄧家彪亦有到場，不過活動上就無hard sell佢，鄧只「低調參與」，無蓋過會慶風頭。