【明報專訊】唔少學校都積極搞北上交流活動，不過一般交流都係為增廣見聞居多，少有計分。Emily噚日收到報料，話同港島華仁書院直屬嘅灣仔番禺會所華仁小學，周三出咗份通告，推介全級小五生參加為期8日嘅「北京歷史文化科技普通話沉浸課程」，行程連食宿要約7000蚊至9000蚊，視乎參加人數而定。參加嘅學生要喺北京上4堂普通話課，行程最後一日要做測驗。由於通告寫明要測驗計分，並寫喺成績表上，令家長疑慮如果無錢或者唔想去，會否影響學生成績。

華仁小學﹕唔參加同學在港上課

根據該校通告，行程除咗上4堂普通話課，仲會參觀耶穌會喺北京嘅歷史遺蹟，如傳教士利瑪竇墓園同耶穌會古觀象台等。通告又話，係北京做嘅普通話評估，成績會記錄喺下學期普通話科嘅整體表現上，而唔參加嘅學生同一時段就要留喺香港上普通話課。

華仁小學兩名副校長廖潔玲同鄧潔雲和Emily傾過，兩人話呢個課程係第一次搞，而學生喺京港參與嘅普通話課程內容、試卷完全一樣；成績表只會列出普通話科嘅整體評級。唔同嘅係，有去北京嘅學生會收到證書，證明佢完成呢個課程，但同普通話科無關。

副校仲話，呢個課程最初出發點係想學生到北京「尋根」，係指辦學機構之一耶穌會嘅源頭，旅程中會參觀耶穌會喺北京留下嘅足迹。今次課程正好一併學習普通話同北京歷史、文化、科技等，一舉多得。

7000幾蚊去北京唔算平，Emily擔心未必個個家長應付到，副校廖潔玲話，家校關係好好，老師都大概知道學生家庭經濟狀况，仲好有信心咁講「如果有經濟困難嘅家庭，我哋係絕對會幫到佢嘅」，唔希望學生因為經濟問題錯過參加課程嘅機會。