【明報專訊】中港兩地市民都好關注前晚嘅港中足球大戰，大家都知國家主席習近平係頭號球迷，仲有一個中國足球夢，就係希望將國家隊打造成世界強隊，以及喺中國舉行世界盃比賽，不過中國隊再次被港隊「攔路」。特首梁振英(CY)噚日趁APEC喺菲律賓馬尼拉同習近平見面，記者當然問CY席間大家有無討論場波呀，CY就話無傾到。

《大公》「港足好嘢」頭版成話題

港中大賽落幕，但全城仍然熱議，除咗讚一班熱血球員同教練等，唔少人都讚埋個龍門、門柱同門楣，有人仲建議要將個龍門搬入博物館紀念。有網民繼續諷刺CY唔敢表態撐港隊，另一邊廂，《大公報》就用頭版大讚港隊，話「守和國足 港足好嘢」，成為政界話題，連泛民議員梁家傑等都要喺facebook上share《大公報》。

原本撲唔到飛入場嘅「體育、演藝、文化及出版界」立法會議員馬逢國，前晚獲得足總嘅朋友邀請入場睇波。馬逢國強調睇波係「履行工作一部分，唔係拎着數」，笑言完成咗「工作」，所以同記者報告，仲話前晚氣氛好好，球迷表現熱情。對於仲有人噓國歌，馬逢國話呢啲球迷只係少數，覺得佢哋係發泄為主、睇波次要，無傷大雅，但形容行徑丟架同唔文明。

馬逢國原來無留意曾俊華嘅facebook，所以唔知財爺越洋睇波，而馬都有為唔識喺外地睇波嘅CY講好說話，話CY可能太忙無時間睇。前晚場波仲有唔少現任同前任立法會議員去睇，包括張文光、單仲偕、李永達、狄志遠同詹培忠等。

港中戰惹關注，雅虎香港噚日公布「2015年大事回顧——十大港聞」排名，港中足球大戰排榜首，因為由球賽宣布舉行、賣飛至比賽結果，都吸引唔少網民熱烈搜尋。