【明報專訊】雨傘運動後成立嘅團體「青年新政」噚日高調宣布，會積極派人參選今年區議會選舉同明年嘅立法會選舉，主打「本土路線」。年底區議會選舉佢哋初步打算派8人出選，包括擬派出年輕OL挑戰現任經民聯議員梁美芬，亦會搵人硬撼民建聯葉國謙。

「青年新政」成立至今3個月，佢哋聲稱已有過百成員加入。人稱「巴治奧」嘅青年新政召集人梁頌恆話，佢哋未來會主打「議會革新」，積極派人參選今年區議會同明年立法會選舉，仲豪言希望喺2019年可以重奪18區區議會，而佢本人就計劃挑戰觀龍樓選區嘅民建聯葉國謙。

盼成「第三勢力」

至於經民聯梁美芬，青年新政打算派出現年23歲、現職OL嘅游蕙禎去黃埔東出戰。喺上一次2011年區會選舉，當時黃埔東選區，有梁美芬、民主黨黃碧雲及「星屑醫生」歐陽英傑3人參選，結果梁美芬勝出。

青年新政計劃派8人出選葵青、油尖旺、九龍城及中西區，區選將主打港人利益優先政策等，話希望能成為「保皇黨」和「反對派」之外嘅「第三勢力」喎。佢哋仲強調，唔會參與傳統政黨嘅區議會協調機制。

Emily噚日問過部分泛民政黨，發現青年新政除咗挑戰建制派大員，其實同泛民至少有兩個撞區情况出現。不過，巴治奧就話佢哋落區時見唔到其他泛民有做緊地區工作，咁當然見唔到有撞區喎。