【明報專訊】多個澳門民間組織舉行「公投」，讓澳門市民可以「公投」選特首，澳門政府批評「公投非法」，指「公投」不符合澳門《基本法》中嘅行政長官選舉辦法，呼籲市民抵制；但「公投」支持者就上載短片，反駁政府嘅說法，話「基本法也沒寫明我可以拉屎，難道拉屎是罪？」短片又反問澳門熊貓嘅名都可以一人一票選出嚟，「領導整個澳門嘅特首我們就一票都無？」

製作動畫反擊「反公投」

呢段名為「認識清楚，政制向前，支持公投」嘅短片其實係二次創作，事緣有反對「公投」嘅人，日前以Silent Macau嘅名義，喺YouTube上載咗一段叫「認識清楚，維護法治，謝絕公投」嘅短片，同市民講解「公投」非法，會令社會分化，又話「公投」會衝擊社會和諧氣氛，製造不安情緒等。

有支持「公投」人士睇唔過眼，專登以noisy macau嘅名義打對台，將呢段反「公投」嘅短片二次創作，變成支持「公投」短片，各市民講解「公投」嘅意義。

另外，除咗澳門，香港真普聯亦推出新短片，同市民講解「篩選」嘅可怕，話如果市民接受一個有篩選嘅選舉，就同食足5年有烏蠅、食材變壞咗嘅「嗱渣麵」無分別。段片仲搵咗藝人歐錦棠做旁述㗎。