【明報專訊】平機會噚日宣布聯同歐盟駐港辦事處、中大亞太研究所性別研究中心，下周五(29號)舉辦全港首個性別共融國際研討會，有西班牙、法國、英國等地專家學者，分享對同志平權立法意見。法國駐香港副總領事Lilas Bernheim話，歐洲同亞洲文化、政治情况雖然唔同，但相信立法時遇到嘅宗教同道德爭議相似，希望歐洲經驗有助香港討論反性傾向歧視立法問題。 法國上年通過同性伴侶婚權及領養權，Bernheim話，法國係全球第14個承認同志婚權嘅國家，雖叫做係「先鋒」，但過程唔容易，喺當地都曾經遇過宗教界同社會人士反對。平機會主席周一嶽話，上任以來，聽到部分宗教團體認為同性戀係罪、覺得同性戀可以「被扭轉」等講法，認為係好大誤解，所以今次研討會嘅成果，會寫成報告派畀公眾，希望成為社會討論嘅參考。
|
| |
| |
