【明報專訊】科技進步，大家未必會再手寫聖誕卡畀親朋好友，但在囚者就只能靠書信同朋友聯絡，唔少泛民候任區議員近日發起「和你寫」，希望市民寫聖誕卡或信畀獄中「手足」，畀啲支持佢哋。而正服刑嘅佔中發起人陳健民，近日就向公民黨立法會議員郭家麒送上聖誕卡，感謝佢多次探訪打氣。 郭家麒喺facebook上載陳健民(KM)嘅聖誕卡，內容所見，KM喺獄中仍心繫反修例抗爭，話最近聽新聞知道，郭家麒喺抗爭現場企喺警察同抗爭者之間，警察同佢講，「你唔使同我哋講嘢，你同啲暴徒講就得喇」，KM話聽到無明火起，難為政府日日話要同社會對話。 荔枝角手足話感受溫暖 立法會議員邵家臻噚日就去咗荔枝角收押所探3個「手足」，引述對方話上星期聽到收押所外集會，又收到聖誕卡同書信，有關書信無為佢哋帶嚟麻煩，只有溫暖。阿臻話遇到工黨張超雄，早佢半步探其他人，透露正安排協調機制，等立法會議員同區議員分工，「探齊所有在荔枝角的手足」。
|
| |
| |
;){kind=small}
;)
