【明報專訊】10月31日係萬聖節前夜，以往呢日中環蘭桂坊都好熱鬧，好多人扮鬼扮馬，但蘭桂坊協會噚日話喺今年嘅社會氣氛下，蘭桂坊唔會搞特別佈置，亦唔會特別辦推廣活動。有網民就號召當晚搞「面具夜」，叫人由銅鑼灣維園行去蘭桂坊「慶祝」萬聖節。 網民號召搞「面具夜」慶祝 《禁蒙面法》已實施，唔知會唔會影響大家萬聖節扮鬼扮馬嘅心情。蘭桂坊協會話𠵱家社會氣氛唔係咁開心，唔想喺呢個時候大肆慶祝，所以今年唔搞活動，又話𠵱家地鐵會提早停運，交通隨時受阻，大家去夜街都唔方便，對消費市道有影響。協會話安全係佢哋首要考慮，現時飲食行業難免受影響，特別係夜市消費，蘭桂坊唔同食肆最近都有做優惠推廣，希望能吸引消費。 蘭桂坊話唔搞慶祝，另邊廂嘅海洋公園，10．31繼續有哈囉喂全園祭，講明「全園恭候 開閘放鬼」，開放至晚上12點，畀大家玩個夠。
|
| |
| |
;)
