【明報專訊】民主派近日抗爭都舉晒黃傘、拉黃色banner，經民聯立法會議員、鄉議局主席劉皇發噚日喺特首梁振英行入立法會會議廳時，就突然除低原本戴住嘅黃呔，唔通佢覺得自己打呔係「政治不正確」，避免令人認為佢係黃絲帶暗撐泛民，所以要立即表態？

有網民見到呢一幕，就講笑話劉皇發呢個名都有同音字「黃」啦，唔通佢打算為表立場，可能要連名都改埋變成劉「藍」發？有記者問發叔做乜嘢除呔，但發叔無講政治原因，只係反問對方「除咗呔唔好睇咩？」然後笑笑口行開。