【明報專訊】仲有一個月左右就係香港回歸20周年，外交部駐港特派員公署噚日舉辦回歸20周年開放日，開放辦公大樓畀市民參觀。噚日有上下晝兩節開放時段，下晝時段原本1點半開始，Emily早到咗，睇到百幾個市民提早半個鐘喺門外排隊入場，公署估計全日超過3000人嚟參觀。

公署辦公大樓平日難得向公眾開放，開放日活動包括新中國外交圖片展、港澳回歸圖片展、內地書畫家現場表演，仲可以欣賞專程來港嘅雲南少數民族藝術團歌舞表演。市民可順道品嘗美食，又可排隊等攞國畫家即席揮毫嘅畫作，仲可以攞公署成立20周年紀念封同圖書等紀念品，真係「又食又拎」皆大歡喜。

外交部駐港公署副特派員胡建中話，今次活動旨在畀香港市民從多角度了解國家優秀傳統文化同中國外交，Emily覺得公署都應該多啲搞呢類親民活動。