【明報專訊】立法會發展事務委員會上周一考察本港供水系統，議員鄭松泰喺社交網站上傳大埔濾水廠嘅片段，見到食水過濾過程，水面出現大片啡色泡泡，令唔少網民擔心，又問現場係咪好臭。發展局長馬紹祥噚日發表網誌，話啡色泡沫只係嶄新嘅濾水技術「溶氣浮選澄清法」，將壓縮空氣加入水中，產生大量微細氣泡，而氣泡會依附住水中嘅懸浮物質，並浮到水面，形成一層「泥氈」，再用活動刮泥板將「泥氈」清走，而澄清後嘅水會喺池底經一條管道送到其他濾水設施，完成濾水程序。

香港約有七成食水來自東江水，水務署一向都話，無論原水水質如何，經過本港濾水廠處理嘅食水，都會符合世衛標準。現時大埔濾水廠主要採用3種技術處理食水，當中「溶氣浮選澄清池」做澄清工作、「初級曝氣生物過濾池」消除水中嘅氨同錳，以及透過「快速重力過濾池」加氯及調校酸鹼度。大埔濾水廠目前正在擴建，目標2018年投入服務，濾水量會由現時每日40萬立方米倍增至80萬立方米，以應付不斷增加嘅需求。