【Emily】港鐵通車45周年 「站見」展加3展品
[2024.10.02] 發表
【明報專訊】噚日除咗係國慶，仲係港鐵通車45周年，港鐵為咗慶祝，噚日喺紅磡站嘅「站見」鐵路展加咗3件新展品，包括俗稱「波鐘」嘅路牌閉塞控制器、第一代車務運作模擬系統，同埋相信會係最受鐵路迷關注嘅標誌性紅白色設計列車車頭。
新加紅白車頭受鐵路迷關注
「站見」鐵路展要事先網上預約登記先可以入場，展覽自4月底開放，周末場次經常爆滿。港鐵回覆Emily話，噚日起展覽已實施新安排，每日場次由5加到6，每場參觀人數大約100。港鐵話今年7月起已加開平日場次，並接受慈善團體同學校團體預約，其他市民如果想預約，周六周日同假日場次就的確比較受歡迎，但平日場次就通常都有餘額。
至於展覽維持到幾時，港鐵重申早前已宣布由原定今年底結束延長至下年，會密切留意展覽運作情况。
另外，鐵路展噚日亦迎來第45,000名參觀者，呢位幸運兒係5歲小朋友，港鐵特登送上紀念品，多謝佢嘅支持。
更多港聞
【Emily】入境處進駐小紅書 頭炮處長粉墨登場
【明報專訊】近年唔少政府部門開設社交平台帳戶做宣傳，其中入境處前日進駐內地小紅書，就人才入境計劃、協助在外香港居民同埋招聘等提供資訊，截至噚... 詳情
【明報專訊】「憲法和基本法推廣督導委員會」轄下嘅「愛國主義教育工作小組」喺國慶日推出一段全新電視宣傳片，背景音樂用咗愛國主義教育主題曲《我們...
詳情
相關新聞
