【明報專訊】特首林鄭月娥早前連同問責班子、行會成員齊齊捐人工，市民反應又點？公民力量民調顯示，73.7%受訪者認為，高官應該以「減薪」代替捐薪；至於減薪幅度，接近六成人認為，特首、問責班子以至立法會議員應減薪6%至10%；近三成市民認為應減薪3%至6%。 公民力量喺本月9至19日，一共收集到1043份有效問卷，當中有42.5%受訪者係零收入。結果亦顯示，雖然逾五成(54.6%)受訪者認同特首同問責班子捐薪做法，但近三成(26.8%)受訪者就認為捐薪係自願、冇約束力。 對於民調結果，公民力量建議特首、問責官員、高級公務員應共同減薪，疫情後重新調整；又話立法會議員、區議員薪酬都係公帑，身為「政府管治團隊一員」，應以實際行動，「包括以薪金支持抗疫工作」。公民力量喺去年區議會選舉「全軍覆沒」，即使區議員減薪，相信對佢哋都冇影響。
|
| |
| |
;)
