【明報專訊】政府早幾日公布最新貧窮情况，18至29歲青年喺政策介入後貧窮率依然連升3年，勞工及福利局長羅致光噚日上電台節目回應，話好多年輕人「裸辭」係背後其中一個原因。佢呢番學術分析就惹起唔少討論，社福界立法會議員邵家臻就話羅局長「只見樹木不見森林」，反問局長：「咁點解啲人要裸辭先得㗎？」

羅致光解釋，好多年輕人會「裸辭」，由一份工轉去另一份工嘅空窗期比較長，統計嘅時候年輕人就會係零收入，貧窮率就會上升。咁究竟貧窮同「裸辭」有咩關係呢？香港眾志成員周庭都喺facebook問，有無IQ高嘅朋友可以解釋到局長嘅邏輯。Emily就向阿臻請教，阿臻就話年輕人會「裸辭」背後係有唔同原因，局長次次都淨係睇到近因，將問題賴番落年輕人身上，實情就係現時就業市場停滯，年輕人睇唔到就業前景，「講都講過一萬次」。

邵家臻：實情就業市場停滯

局長又話，每次大家都淨係睇統計數字，而貧窮率上升只係個趨勢，3年算少㗎啦，可以連升好多年。阿臻就同Emily講，話局長以往一直叫人唔好淨係睇理論，要睇實證、睇數字，𠵱家又話公眾淨係睇統計數字，真係「公就我贏，字就你輸」——「無得輸」。