【明報專訊】反修例風波下，建制派喺區議會選舉過程中呼籲選民投票表達反暴力，最終整體取得逾四成選票，但議席輸咗好多，泛民則取得逾380席。喺西環選區爭取連任失敗嘅民建聯張國鈞噚日喺facebook出片，向候任區議員「教路」，話佢哋應該向暴徒、向暴力說不。張國鈞話，留意到唔少候任議員當選後嘅評論，有當選人巡東鐵大學站，話破壞非常嚴重、交通唔理想，希望政府部門加緊交通接駁；佢反問：「佢哋又記唔記得，破壞嘅情况當日係由咩人一手造成？」

張國鈞話，中大發生暴亂，東鐵線大學站受嚴重破壞，近乎要重建，各區出現「遍地開花」嘅暴亂；又指「唔少市民」都話好擔心，見到有參與暴力者將進入新一屆區議會，過去數月攞過汽油彈、參加過「私了」嘅人，會搖身一變成為著西裝、跟港鐵職員巡視受破壞車站嘅候任議員。

佢提到，最近有候任議員批評街上冇咗好多垃圾桶，政府部門只用垃圾膠袋裝垃圾，膠袋容量小、易有破損，造成衛生問題。佢就反問：「點解垃圾桶由當日嘅存在變為不存在，變成堵路嘅設施，掉到入我被破壞嘅區議員辦事處？」張國鈞呼籲候任區議員不單要學識落區關心社區設施，更應該向暴徒、暴力說不，阻止暴力喺社區滋長，攜手止暴制亂。