【明報專訊】各行各業都有機會「出trip」，去外地公幹或交流。有機構做咗個「出差津貼報告」，發現香港連續兩年係亞洲公幹費用最貴嘅城市，每日使費仲比第二名嘅東京高21美元(約164港元)。而全球排名嚟講，紐約膺首位，每日平均開支係香港嘅1.5倍，高達799美元(約6232.2港元)。

人力資源顧問機構ECA International發表最新嘅「出差津貼報告」，指出香港連續第二年成為亞洲公幹費用最昂貴城市，每日平均要約4017港元，其中有2000幾蚊係酒店費用。Emily上網睇過，九龍香格里拉大酒店最新房價最平係2300蚊。

講到全球最貴，去紐約公幹平均每日開支要6200幾港元，比第二名嘅日內瓦貴差唔多650蚊港紙，ECA解釋係因為紐約酒店需求大，令酒店持續收高昂住宿費，每日喺紐約嘅酒店費係512美元(約3994港元 )，已經同去香港公幹嘅每日整體支出差唔多！

至於最「實惠」嘅公幹地方，係馬來西亞嘅城市新山，每日出差成本只需184美元(約1435元)。