【明報專訊】強烈熱帶風暴「帕卡」襲港，成為繼強颱風「天鴿」後一個禮拜內第二個風暴。天文台前台長林超英出席商台節目《政好星期天》時話，有人批評「澳門發出熱帶氣旋警告遲於香港」嘅說法唔公道，因為「天鴿」影響香港嘅時間早過澳門。 林超英形容，「天鴿」嘅威力可以同1962年吹襲香港嘅颱風「溫黛」相比。「天鴿」無對香港造成重大影響係香港好彩，因為「天鴿」只喺南面掠過，風力最強範圍無入到本港，但若當時颱風向北走多20公里，情况會完全唔同。 以往起新市鎮 填海填高啲避浸 林超英話「天鴿」喺澳門造成嚴重破壞，亦都係香港嘅一個警惕；政府唔可以忽視海水上升嘅問題，如果要將人口安置喺水邊位置，必須先做好前期準備工作，例如計算好將來風暴同大潮所造成嘅影響。佢回憶本港早喺1960、70年代，興建沙田同大埔新市填時都要填海，但要填幾高呢？當時都有爭拗，佢哋天文台就研究，計算喺風暴潮下水位最高嘅上升水平，填海時不惜工本填高一啲，令附近居民唔會受呢啲幾十年一遇嘅風暴潮影響。所以佢話今次打風啲水點升都好，沙田都只係浸咗個單車徑，但對民居「絲毫不動」。 憂鋁窗設計問題 強風易爛 佢又話現時本港大廈鋁窗設計有問題，如果鋁窗扣唔穩，遇上強風時容易破爛，大幅玻璃亦容易被吹裂。佢擔心大廈愈起愈高，如果再有溫黛級數嘅強風來襲，窗有事，「我們可以走去邊？」
|
| |
| |
;){kind=small}
;)
