【明報專訊】強颱風「天鴿」噚日吹襲香港，法庭都要休息一日，結果就令到有多宗官司在身嘅社民連主席吳文遠，有兩宗案件上庭時間撞期。咁佢咪要「分身」上庭？

吳文遠話，原本一連兩日要就兩單官司上庭，分別涉及上年反釋法遊行以及涉披露廉署受調查人士身分而被控，佢原本預料時間啱啱好，仲可以夾到時間喺高院睇一睇同樣要就案件上庭、正於監獄服刑嘅黃浩銘同黃之鋒，但人算不如天算，一個颱風，搞到上庭時間「自己撞自己期」。文遠話，反釋法遊行案同ICAC泄密案都要於今朝9點半上庭，前者喺西九龍裁判法院，後者喺東區裁判法院。分身上庭就無可能嘞，文遠話只可以先去反釋法遊行案，再同律師飛的士去東區法院，但預咗會遲到，最可惜係無得去高院睇一睇阿銘同之鋒。