【明報專訊】海洋公園本周五(14號)起舉行為期一個月嘅「親親動物月」，入場者可以近距離欣賞到樹懶、北極狐等動物。公園並首次推出期間限定環節「約會海獅」，額外畀多180元就可以參加，二人同行可以298元參加，只需入園當日即場報名就可以。

13館動物近距離接觸

「親親動物月」喺4月14日至5月14日舉行，公園會喺特定時間安排13個動物館嘅動物同大家近距離接觸。其中包括今年8歲嘅二趾樹懶小樹，小樹嘅可愛程度直逼電影《優獸大都會》嘅樹懶阿閃𠻹。

預告可愛樹懶常放臭屁

小樹嘅護理員Eric就爆料話，樹懶好少去廁所，通常四五日甚至一個星期先去一次，所以每次放屁都好臭，希望市民聞到臭味時，千祈唔好以為係Eric放屁。市民欲知見面時間，可留意海洋公園網頁。

另外，公園新設計咗一個手機流動應用程式，市民打開個App，喺唔同動物展館掃描特定嘅QR code，只要儲齊5個就可以玩一次遊戲，答中問題可以獲得餐飲優惠券，如果儲齊20個QR code，就可以獲得一次抽獎機會，有機會免費得到「企鵝全接觸」4人家庭套票(每位原價1180元)，或者門票買一送一優惠，抽獎結果於5月31號公布。