【明報專訊】佔領行動以來，Emily同行家不時都收到假冒電郵，但最近居然連台灣政府都中招，台灣中央研究院副研究員黃國昌收到假冒台灣外交部嘅電郵，邀請出席「香港政改和佔中行動對台灣未來之可能影響」座談會。點知原來電郵係假嘅，台灣外交部噚日話，確認有人冒用名義發出假電郵，已加強內部注意。 黃國昌月初喺facebook話，收到自稱係台灣外交部外交學院秘書高國鼎嘅電郵，話會舉行座談會，覺得好有意義、有覆信。點知到場後，發現根本無呢場活動。黃國昌話，覆信時已經唔小心開咗附件，擔心電腦中毒。 台灣外交部外交及國際事務學院主秘吳尚年，噚日喺例行記者會上交代事件，話已經調查完畢，確定今次唔係外交部系統問題，而係有外人冒用名義發送呢個電郵。冒名電郵唔係來自官方網址，但內容中嘅單位同人名確係真有其人，已提醒部門注意資訊安全。 另邊廂，香港有記者噚日收到一個叫Raymond Chow嘅人寄出嘅電郵，話佔領運動已一段時間，邀請記者交流，商討運動發展路向，仲附上一個簡報檔。學聯秘書長周永康話無發出過呢個邀請，唔知係邊個想搵記者交流呢？
|
| |
| |
;)
