【明報專訊】政府呼籲市民節約用水成效不大,發展局長陳茂波都開腔,希望大家慳啲水,佢仲重提1963至1964年香港實施制水、4日供水4小時嘅「那些年」,話當時有唔少香港人以兩個星期洗頭一次、飯後或睡前食蘋果代替刷牙嚟慳水。唔知呢啲招數70後、80後受唔受呢?
話以前用吃蘋果代刷牙
陳茂波喺佢個blog「局長隨筆」度話,港人每日平均耗用食水130公升、冲廁水90公升,仲多過新加坡同倫敦,曲線話香港人真係好鬼嘥水。佢話全球水資源有限,應未雨綢繆,只要花點心思,就可以達到慳水目的,例如縮短花灑淋浴1分鐘,已可以慳水10公升;刷牙、剃鬚關咗水龍頭,一家四口就可以慳水26公升;以浸洗代替長開水龍頭洗蔬果,每日亦可慳水14公升。
水務署上個禮拜六啟動咗「齊來慳水10公升」運動,希望每個市民每日慳水10公升,為建立良好用水習慣踏出第一步。