【明報專訊】王維基(Ricky)頻頻去各間大學、中學演講，成日都著得好醒神，Emily呢幾日同佢食飯，知道佢有志搞條24小時購物頻道兼網購平台，Ricky仲自爆前排第一次試網上購物，順便取經。佢喺一個英國網站買嘢，原本諗住買兩件恤衫就算，點知揀吓揀吓就買咗6件恤衫、1條褲再加多對鞋，使咗萬幾蚊港紙，睇嚟買衫買鞋並非女士專利。

Ricky話第一次網上購物經驗愉快，除咗有兩件恤衫買細咗要換貨之外，其他貨物都好啱心水，最開心係對鞋雖然無試著過，不過一啲都唔「刮腳」。Ricky仲話，雖然購物頻道加網購平台喺香港係一片藍海，成功與否好難預計，但連佢係男人都買得咁開心，女士一定更加喜歡網購啦；加上如果賣嘅貨品夠特別、銷售流程又做得好，有信心製造商機。