【明報專訊】自由黨同特首梁振英關係唔好係人都知，但估唔到自由黨黨魁田北俊喺北京開兩會時，亦不留情面，當住其他政協面前批評梁振英政府，佢話內地唔少政協發言時都可以批評中央，自己喺立法會有票，但香港政府都唔聽，更何况佢係政協委員身分呢？ 「連有票議員說話都不聽」 噚日政協朝早召開小組會議，討論國家政策，好似其他港區成員，都會講吓深化改革等問題，而田少就對政協身分有啲疑問，佢話雖然政協應該多發聲，但係自己作為有票嘅立法會議員，政府「連我們有票議員說話都不聽，為什麼會聽政協的說話？」，又話特區政府亦無就政策細節、數據等向政協解釋，佢真係唔知點發聲好。 沈沖：有啲人提意見別有用心 本身係中聯辦協調部長嘅政協委員沈沖，發言時就特別回應田少言論，佢話用政協身分提意見係協助政府施政，但係香港有啲人提意見就「別有用心、另有想法」，唔係出於善意，強調政協提意見嘅大前提，係應該要知道特區政府由中央任命，有憲制角色。唔知佢口中所指提意見別有用心嗰啲人係邊個呢？
|
| |
| |
