【明報專訊】Emily做學生時報過唔少工聯會進修課程，由水電維修到社交舞都有得學，非常多元化。今期工聯會最新課程，真係走在潮流尖端——「懷才不遇自救法」進修班，3小時講座，盛惠港幣140元！3個鐘頭就可以「自救」，Emily打去工聯會問有咩咁犀利，唔通係心理學家，定係職場達人傳授秘技？職員話，事關個人私隱，唔方便透露導師背景咁話，叫Emily自己參詳課程簡介。

工聯會開班 盛惠140元

課程簡介第一句就話：「社會上部分人會感覺到總是懷才不遇，總是找不到能發揮自我才能的機會！」可能呢番話講中唔少人心聲，簡介叫大家「不應以越軌行為來表現自己的天分」咁話。

至於點先至唔使「懷才不遇」，簡介無提到，只係話會「講解及分享如何去發展自己的才能，如何去創造機會」。不過，140元上3個鐘堂，以工聯會課程收費標準唔算平，唔知會唔會影響報讀意欲呢？