【Emily】開壇熱身 蘇B重返維園直播
【明報專訊】陪伴港人成長嘅港台長壽電視節目《城市論壇》今年踏入40周年,但疫情下有超過半年無喺維園音樂亭「開壇」。新一季節目開始前,主持人蘇敬恆(蘇B)噚日先帶大家返維園熱吓身,佢喺網上直播同觀眾講:「40年來,我哋都希望可以喺一個開放嘅環境、空間,畀大家喺毫無恐懼下表達諗法」,所以節目一直都想喺戶外做直播。
希望喺開放環境 無恐懼表達諗法
雖然因為疫情同限聚令,節目未必可以好快返維園,但蘇B話希望大家一齊「普及論政、普及發聲」,市民可就社會唔同議題發表睇法。
立法會選舉押後一年,蘇B噚日中午自己喺維園草地做網上直播、並無嘉賓,佢話「上一季《城市論壇》最後嗰集,我哋仲傾緊立法會選舉,估唔到世事變化實在太快」。蘇B話新一季節目開始前,想帶大家返嚟維園,感受一吓自由嘅空氣。
《城市論壇》上一次喺維園舉行要數到上年11月24日區議會選舉日,隨後曾移師其他公園。今年初疫情來襲,更試過喺錄影廠、港台大樓天台等「開壇」直播。