【明報專訊】天文台每年3月都會開記者會講吓全年天氣展望，包括市民關心嘅全年影響香港熱帶氣旋嘅數目。受疫情影響，天文台採用咗近期大熱嘅應用程式Zoom舉行視像會議，秉承天文台擁抱新科技嘅傳統，今年2月先接任台長嘅鄭楚明，就要隔住個屏幕做簡報，天文台無安排直播，市民無緣一睹台長風采。

記者部分時間聽唔到 要後補資料

不過，天文台決定Zoom嘅時候，唔知係咪無考慮到係咪所有傳媒嘅軟硬件都可以配合，記者會開始前，先至發現唔少記者未必有咪或鏡頭，有記者更反映記招期間，有部分時間未能聽到台長發言，需要後補資料；亦有唔少行家因為無安裝咪而要打字發問，加上發問時間有限，記招不足一小時便完結，稍為美中不足。希望疫情盡快過去，天文台能以傳統方式向市民發表全年天氣預測啦。