【明報專訊】Emily噚日提到，民主黨黃碧雲喺facebook分享完黨友尹兆堅、鄺俊宇喺「元朗7．21事件」8個月衝突現場中胡椒噴霧嘅新聞，轉頭就上載食「胡椒蟹餐」慶祝生日嘅相同帖文，事件引起黨內關注。碧雲噚日就話接受大家批評，帖文係希望表達謝意，如果令黨友同支持者感到冒犯，會摯誠道歉。

碧雲噚晚喺fb出post，話就Emily嘅報道，佢完全明白各方關注、接受大家批評，強調胡椒蟹帖文係希望表達謝意，因為亂世中大家仍然記得佢生日，並予祝福鼓勵，令佢非常感動。碧雲又話，識佢嘅朋友都知佢鍾意食蟹，所以喺佢生日前夕請佢食蟹慶祝，強調絕無半點揶揄任何人、無不關心警暴嘅意思，若帖文令黨友、支持者感到被冒犯，「我在此作出摯誠的道歉」。Emily再睇碧雲fb，胡椒蟹帖文已經唔見咗。