【明報專訊】為感謝警察，「正義聯盟」主席李偲嫣一行廿幾人噚日送咗1萬盒紙包檸檬茶同菊花茶去警總。佢話原本想送9999盒，代表「真金不怕洪爐火」，後來加多一盒，要畀「一哥」盧偉聰。有同行女子之後大叫：「一哥你唔好出糧就做一哥，平時做嘢就『了哥』！」
出咗幾萬蚊買飲品嘅新加坡香港商會同新加坡九龍會會長陳文平話，移居新加坡30年，睇新聞見「有班友仔搞搞震，辣着好多人」。佢質疑點解示威者要戴口罩，戴口罩只會係病人、抵抗力弱者、或「攻擊性瘋狗」。
李偲嫣噚日發表五大訴求：盼一哥向前線警察致謝並帶領佢哋保護香港；定性6‧12為暴動；盼一哥適當指揮，緊貼崗位；不滿衝突中有立法會議員成日「阻差辦公」；盼設特別小組調查網上發動暴亂。佢送飲品時，仲同時送咗個寫住「大丈夫」嘅獎牌，由警隊福利部接收。
送禮後，李偲嫣又去加拿大總領事館示威，抗議歌手何韻詩喺聯合國發言，行程相當緊湊呀。
