【明報專訊】康文署早前宣布調高紅館同伊館表演門票嘅公開發售比例，民政事務局長劉江華噚日喺立法會原本應傳媒要求，去到會議室外俗稱「咪兜」嘅受訪位置，接受相關提問，局長行到咪兜時先話「我講完就署長講」，即係佢簡介後，就由身旁嘅康文署長李美嫦詳細解釋。不過記者剛開始發問，劉江華就將解答工作直接推畀李美嫦，話「不如署長你講晒啦好唔好呀」，一個轉身走人，消失於記者視線。

李美嫦最終喺咪兜獨自回應傳媒，劉江華未有在旁陪同，佢離開現場時，解釋交由署長解答係唔想回答嘅官員換嚟換去咁話。其實睇番早兩日政府就遺失選民登記冊事件會見傳媒時，政制及內地事務局長聶德權都有同選舉事務處總選舉事務主任黃思文輪流作答，聶德權當時亦無離黃思文而去，兩件事或者都反映到不同局長嘅唔同處事手法啦。