【明報專訊】大熊貓盈盈同樂樂自然交配又失敗。海洋公園日前見盈盈樂樂開始發情，星期日關閉熊貓館，營造合適嘅交配環境，但呢3日嘅交配期間，海洋公園觀察到佢哋喺呢段時間共有8次共處時間，仍未能成功自然交配，園方決定噚日重開展館，又話已為盈盈三度人工授精，暫時未知結果。

海洋公園話，盈盈3月下旬起開始花更多時間嬉水，樂樂就喺棲息地留低氣味標記，又會嗅探盈盈嘅氣味，呢啲行為同大熊貓每年一次於3至5月嘅發情期脗合，獸醫團隊確認兩隻大熊貓進入今年繁殖期。園方亦以兩隻大熊貓已踏入繁殖期為理由，爭取毋須北上繁殖，可惜盈盈樂樂喺「黃金72小時」仍未能成功交配。

園方話已用樂樂嘅精液為盈盈人工授精，料要觀察數月。由於盈盈樂樂嘅繁殖高峰期已過，園方噚日宣布「大熊貓之旅」展館重開。