【明報專訊】工聯會會長吳秋北上個月喺facebook貼文，形容已故中共領導毛澤東嘅誕辰(12月26日)「才是中國人的聖誕節」，引起網上熱議。民主黨副主席兼南區區議員羅健熙前晚喺港鐵利東站外欄杆掛起幾幅橫額，以毛澤東同吳秋北圖片做圖像，列舉毛澤東發動反右運動、大躍進同文化大革命等，令數以千萬人受害。 羅健熙喺facebook話，今次行動係「為表揚吳秋北同志心繫共黨、獨尊毛毛」，並向「昧於中國當代歷史、不對共產黨感恩戴德、在21世紀欠缺愛黨情操的愚昧邨民簡介毛主席開天辟(闢)地的偉績」。 列舉反右大躍進文革千萬人受害 佢喺帖文落咗個揶揄標籤，包括「毛誕才是中國人的聖誕」、「毛主席具開天辟(闢)地的首創之功」同「毛主席仙福永享壽與天齊」，並不忘諷刺吳秋北覺得毛澤東「地位等同耶穌 」。而橫額旁邊更寫明係《建制語錄》專欄，由「南區區議員羅健熙敬贈」。
|
| |
| |
;){kind=small}
